BASQUETOUR

Basquetour buru duen euskal ordezkaritza komertzial bat Guadalajaran (Mexiko) bildu da bidaia-eragile, turoperadore eta industria turistikoko bazkideekin, baita komunikabideekin ere, Euskadiren premium eskaintza zabal eta aparta ezagutzera emateko, bidaiari mexikarren artean interesa areagotzeko asmoz.

Euskadiko Confidential klubeko sei hotelek eta luxuzko lau DMCk osatutako euskal ordezkaritzak negozio saio bat egin zuen, banan-banan, Mexikoko merkaturako produktu eta pakete turistikoak garatzeko ideiak eta planak partekatzeko. Confidential, Euskadi – Basque Country marka turistikoaren premium produktuen kluba da. 92 luxuzko enpresa ditu, jatetxe, hotel eta esperientzien artean.

Ekitaldia Guadalajarako Bruna jatetxean izan zen, non bertaratutakoek euskal sukaldaritzan inspiratutako platertxo goxoak dastatu zituzten, Michelin Izarrak dituzten jatetxe ugariek mundu mailan ezagutzen dituztenak.

Daniel Solanak, Basquetourreko zuzendariak, Euskadik duen eskaintza turistiko anitza aipatu zuen, eta honako hau adierazi zuen: "Mexiko herrialde anaia bat da, eta zintzo sentitzen gara hemen egoteagatik, gure helmuga turistikoan dugun produktu bereizgarria aurkezteko, ezin hobea esperientzia paregabeak bilatzen dituzten bidaiari mexikarrentzat".

Aldez aurretik, euskal ordezkaritzak topaketa bana izan zuen hirian bi turoperadore premium garrantzitsurekin, Panorama eta Sevilla Sol, hain zuzen ere; biak “Virtuoso”, munduko luxuzko bidaia-agentzien sare garrantzitsueneko kideak baitira eta Euskadi ere, sarearen parte baita.

“Virtuoso” sareak 1,100 agentzia baino gehiago ditu 50 herrialdetan eta 22,000 aholkulari aditu baino gehiago, eta konexio pertsonalak erabiltzen ditu 2,000 hotel, gurutzaldi-linea, airelinea eta helmuga globalekin, esperientzia paregabe eta pertsonalizatuak eskaintzeko.

Guadalajararen ostean, euskal ordezkaritza Kolonbiara joango da, eta datorren asteazkenean Bogotako eta Medellingo agente eta turoperadoreekin bilduko da.