• FITUR 2025
Euskadik kanpaina bat aurkeztu du "denok turistak garela gogorarazteko" eta turismoaren eta herritarren arteko bizikidetza sustatzeko
" Turismo eta Merkataritzako sailburuorde Jakes Agirrezabalek "turismo maitea" kanpaina aurkeztu du Fitur 2025en, turismo-sektorearen lanari eta herritarrekiko harremanari balioa emateko.
Fiturren jardunaldi bizia egin eta Euskadiko standaren inaugurazioaren ondoren, "turismo maitea" kanpaina aurkeztu da gaur, "turismoaren eta herritarren" arteko harremana sendotzeko asmoz. Turismo eta Merkataritzako sailburuorde Jakes Agirrezabalek azaldu duenez, "Euskadin denbora asko daramagu eragile, bisitari eta sektore guztien ongizatea kontuan hartuko duten turismo-politikak bultzatzen, baina baita ezinbesteko beste eragile batena ere, Euskadin bizi diren pertsonena eta bisitariekin duten bizikidetzarena. Bisitatzen gaituztenek eta bertan bizi direnek goza dezaketen Euskadi nahi dugu ".
Turismo maitea kanpainak turismo-sektoreak Euskadiko Turismoaren Kode Etikoarekin duen konpromisoa nabarmentzen du, 800 enpresa baino gehiago baititu atxikita. Kode etikoaren konpromisoen bidez, kanpainak turisten eta bizilagunen arteko errespetua, erantzukizuna, jasangarritasuna eta irisgarritasuna azpimarratzen ditu.
"Sektore sendoa, lehiakorra eta jasangarritasunarekin konprometitua dugu, eta turismoak dakarren aberastasunaren partaide izatea nahi dugu, ez bakarrik ekonomikoa, baita kulturala eta soziala ere. Turismo jasangarriaren eredu bat bultzatzen jarraituko dugu, gure sektorearen, bere eskubideen eta gure herritarren ongizatearen defentsan oinarritua, turismo arduratsu eta orekatua sustatuz "amaitu du.
