• SUSTAPEN ETA MERKATURATZE TURISTIKOA
Euskadi - Basque Country Confidential Sevillako EMOTIONS azokan nabarmendu da
EMOTIONS azoka, premium segmentuari eskainia, Sevillan egiten ari da 2024ko ekainaren 2tik 5era, "Euskadi - Basque Country, Confidential" markaren partaidetza nabarmenarekin. Mundu osoko premium turismoko eragileak biltzen dituen ekitaldi honek Euskadi du babesle, laugarren urtez jarraian.
Azoka Andaluziako hiriburuan egiten da, eta 200 erakusle eta 200 erosle inguru bertaratzea espero du. Hiru egunez bilduko dira luxuzko turismoaren azken joerak eta eskaintzak aztertzeko. Euskadik, bikaintasunarekiko konpromiso etengabearekin, gero eta zorrotzagoa den bidaiari baten beharrak asetzera bideratutako eskaintza aurkezten du.
Euskadiren proposamenaren ardatza zerbitzu guztiz pertsonalizatuak ematea da, bisitari bakoitzak bakarrak eta bereziak sentiarazten dituzten esperientziez gozatzeko aukera izan dezan. Premium bezeroarentzat soilik diren zerbitzuetan espezializatutako agentziak eta nahierara egindako esperientziak biltzen ditu Euskadiko gidak. Esperientzia horiek bidaiari-mota desberdinentzat diseinatuta daude, eta kultura- eta museo-jarduerak, gastronomia-jarduerak, kirol-jarduerak, ongizate-jarduerak eta natura-jarduerak barne hartzen dituzte.
Parte-hartze horrekin, Euskadik luxuzko helmuga gisa duen posizioa berresten du, eta bidaiari zorrotzenen itxaropenak ere gainditzen ditu, tradizioaren, berrikuntzaren eta kalitatearen nahasketa paregabea eskainiz.
