BASQUETOUR

Javier Hurtado Turismo, Merkataritza eta Kontsumoko sailburuak Burdinmendi bide berdearen gida aurkeztu du gaur. Gida Basquetourrek egin du bide berde hori sustatzeko. Ibilbidea lehentasunezko jarduketa-eremuen funtsei esker birgaitu da. Aurkezpenean, Leire Sáez Bizkaiko Foru Aldundiko Turismoko zuzendaria, Iñaki Urrutia Abanto-Zierbenako alkatea eta Enkarturreko ordezkariak ere izan dira.

Sailburuak azaldu duenez, Burdinmendi bide berdearen gidak amaiera eman dio ibilbidea birgaitzeko eta hobetzeko eta turismo-sustapenerako prest jartzeko lanari. Bizkaiko bide berde luzeena da, eta Bilborekin bidegorrien bidez lotzeko aukera ematen du, liburuxkan nabarmentzen denez, eta, beraz, lurraldea egituratzen laguntzen du. Abanto-Zierbena, Artzentales, Galdames, Muskiz, Sopuerta eta Zierbena dira bidea mantentzen duten udalerriak.

«Turismo, Merkataritza eta Kontsumo Sailak udalerriekin eta eskualdeekin ekintzak koordinatzeko egin duen apustuaren parte da, baliabide turistikoak indartzeko eta sustatzeko. Lehentasunezko jarduketa-eremuen funtsen bidez, 6,5 milioi inbertitu ditugu hainbat udalerri eta eskualdetan jarduketa turistikoak gauzatzeko, eta horietatik 500.000 euro bideratu dira Abanto-Zierbenako jarduketetara, bide berdeari eta haren inguruneari dagokienez».

Halaber, sailburuak Bide Berdeen Europako Sariak aurtengo urriaren 9an Enkarterrin izango direla iragarri du. Bide Berdeen Europako Elkartearen nazioarteko sari horiek Euskadiren irudia proiektatzen lagunduko dute, zikloturismoaren arloko nazioarteko erreferentzia gisa.

«Turismo Sailak zikloturismoaren alde egindako apustua argia da, turismo aktiboa eta naturarekin eta ingurumenarekiko errespetuarekin lotuagoa sustatzen baitu. Eta, batez ere, turismo-jasangarritasunaren funtsezko zutabeei mesede egiten die: turismoa lurralde osoan banatzea eta desestazionalizazioa». Hitz horiek esanda bukatu du, aldundi, eskualde, udalerri eta eragileekin gauzatutako lankidetza instituzionala eskertu ondoren, «berebiziko garrantzia duen» lankidetza.