• MEET BASQUE COUNTRY
Euskadik ongietorria eman die Meet Basque Countryko nazioarteko 60 turoperadoreei Donostian
Basquetourrek antolatutako ekitaldian eta bertan izan ziren Turismo sailburu Javier Hurtado, Donostiako alkate Eneko Goia, Gipuzkoako Turismo diputatu Azahara Domínguez eta Euskadiko turismo-elkarteetako ordezkariak, besteak beste.
Ekitaldian helmugaren aurkezpen bat egin zen eta euskal gastronomiaren produktuekin egindako koktel bat eskaini zen.
Atzo arratsaldean hasi zen ofizialki Meet Basque Country 2023 ekitaldia, Donostiako Aquariumean, turismoa merkaturatzeko makroekitaldi honetan parte hartzen duten mundu osoko 17 herrialdetako 60 turoperadoreei ongietorria eginez. Hasiera ofiziala izan zen, baina astelehenean, hilak 2, iritsi ziren Euskadira, eta bertatik bertara euskal turismo-eskaintzaren alderdirik nabarmenenak ezagutarazteko propio prestatutako gaiak ezagutzeko bidaiak hasi ziren.
Basquetourrek antolatutako ekitaldian ehun bat gonbidatu izan ziren, besteak beste, Daniel Solana Basquetourreko zuzendaria eta Euskadiko turismo elkarteetako ordezkariak, eta bertan parte hartu zuten Javier Hurtado Turismo sailburuak, Eneko Goia Donostiako alkateak eta Azahara Dominguez Gipuzkoako Turismo diputatuak.
Turoperadore gehienentzat ezezaguna den helmugaren eta turismo-eskaintzaren aurkezpen labur baten ondoren, gonbidatuek Aquariuma bisitatu zuten eta euskal gastronomiako produktuak dastatu zituzten.
Gaur goizean, turoperadoreek MICEn, zikloturismoan, naturan, gastronomian, confidentialean eta touringean espezializatutako ezagutza-bidaiekin jarraituko dute, eta bihar, osteguna, amaituko dira. Basquetourreko gida profesional eta pertsonalek lagunduta, eragileek esperientzia bereziak izango dituzte eta Euskadi osoko ibilbideetaz gozatuko dute; orain arte Donostia, Getaria, Tolosa, Bilbo, Hondarribia, Zarautz edo euskal kostaldeko Geoparketik igaro dira.
Arratsalde-gau partean, "basque festival" jaialdia izango da, Gasteizen ospatuko den ekitaldi kultural eta gastronomikoa.
