• SUSTAPEN ETA MERKATURATZE TURISTIKOA
Euskadi eragin handiko helmuga da Estatu Batuetan
Euskadik bi aste barru aurkeztuko ditu bere erakargarritasun turistikoak Las Vegasen, Virtuoso Travel Week-en esparruan.
Abuztuaren 10etik 16ra bitartean, Basquetourrek nazioarteko ekitaldi honetan parte hartuko du, Euskadik helmuga turistiko gisa dituen erakargarritasunak erakusteko eta Euskadi inpaktu handiko bidaiariarentzat erreferente gisa kokatzen jarraitzeko.
Hitzordu hori Ipar Amerikako bidaia-agentzien sareko garrantzitsuena da, eta mundu mailako luxuzko turismo-zerbitzuak hornitzen dituzten enpresa garrantzitsuetako 6.000 agente eta ordezkari baino gehiago biltzen ditu. Ekitaldi hau aukera paregabea da Euskadiko berrikuntzak erakusteko, segmentu honetako entzuleria kualifikatu eta garrantzitsuenaren aurrean.
Ekitaldi honetan, Basquetourrek bilera-agenda oso bat garatuko du Euskadiko aberastasun kultural, gastronomiko eta naturalak nabarmentzeko. Eskualdeko eskaintza turistikoaren jauzi kualitatiboa bultzatu duten aktiboak aurkeztuko dira, hotel-irekiera berriak, kultura- eta aisialdi-proiektuak eta euskal ondare gastronomiko bikaina barne. Gainera, lurraldeko esperientzia eta zerbitzu esklusiboak erakutsiko dira, merkatu estatubatuarrarentzat duten erakargarritasuna azpimarratuz.
Basquetourrek sustapen-ekintza segmentatuak areagotu ditu, eragin handiko nazioarteko bidaiaria erakartzera bideratuak, eta premium eragileekin Virtuosoko bazkide gisa egindako topaketa profesionaletan parte hartu du. Estrategia horren helburua da urtean bidaia asko egiten dituen, desestazionalizazioa errazten duen eta gastatzeko gaitasun handia duen bisitari-profil baten etorrera sustatzea.
