BASQUETOUR

Turismo, Merkataritza eta Kontsumoko sailburu Javier Hurtado eta Gizarte Eskubide, Kontsumo eta 2030 Agendako ministro Pablo Bustinduy gaur bildu dira, bi administrazioen arteko koordinazioa indartzen jarraitzeko eta Euskadiko Kontsumoko Arbitraje Batzordea gatazkak konpontzeko lehentasunezko erakunde gisa gaitzeko hitzarmena sinatzeko. Hitzarmena asteartean onartu zuen Gobernu Kontseiluak.

Sailburuak eta ministroak online iragartzen diren plataformetan legez kanpoko erabilera turistikoko etxebizitzen kontrolari buruz hitz egin dute. Ildo horretan, Ministerioak Airbnb enpresari eskatu dio 65.000 iragarki baino gehiago blokeatzeko bere online plataformatik.

Turismo, Merkataritza eta Kontsumo Sailak eta Gizarte Eskubide, Kontsumo eta Agenda 2030 Ministerioak erregulartasunez lan egin dute erabilera turistikoko etxebizitzen kontrolari buruzko hainbat ekintza koordinatzeko, beste eremu batzuez gain, eta topaketa honekin gai horretan sakontzen eta lankidetzarako bide berriak irekitzen jarraitu nahi da.

Sailburuak Euskadin azken urteotan etxebizitza turistikoen kontrolaren arloan egin diren ekintzak azaldu dizkio ministroari. Hamarkada honetan, 2016ko Turismo Legea eta 2018ko Erabilera Turistikoko Etxebizitzen Dekretua garatu dira. Une honetan, Saila araudi berria garatzen ari da, Turismo Lege berri batekin, egoera aldakorrera eta arlo horretako behar berrietara egokitzen jarraitu ahal izateko.

Era berean, lankidetzan jardun da Etxebizitza eta Hiri Agenda Sailarekin eta legebiltzar-taldeekin, Etxebizitza, lurzoru eta hirigintzaren arloko premiazko neurrien Legea izapidetzeko. Lege horrek neurri bat jasoko du, eremu tentsionatuetan erabilera turistikoko etxebizitza berrien jarduera debekatzeko.

Gainera, udalekin lankidetzan aritzeko protokoloak eguneratu dira txostenak egiteko; iruzurraren aurkako postontzi bat prestatu da salaketak errazteko, eta aktiboki lan egin da iraupen laburreko Alokairuen Europako Erregelamendu berriarekin, mekanismoak gaitzen dituena plataformak beren datuak agintaritza eskudunekin partekatzera behartzeko.

Araudi horri dagokionez, orain Etxebizitza eta Hiri Agendako Ministerioarekin lankidetzan ari da saila. Ministerio honek uztailaren 1ean indarrean sartuko den leihatila bakarreko mekanismoa gaitu du etxebizitza turistikoen erregistro bakarra sortu ahal izateko, plataformekin datuak trukatzeko eta legez kanpoko etxebizitzak detektatzeko eta baja emateko.

Euskadik badu erregistro propio bat (REATE), ostatu turistiko guztiak biltzen dituena, eta orain leihatila bakarrarekin elkarreragingarritasuna lantzen ari da; beraz, uztailaren 1etik aurrera bi erregistroak nahitaezkoak izango dira Euskadiko erabilera turistikoko etxebizitzetarako (REATE 2016tik da derrigorrezkoa).

Sailburuak ministroari azaldu dio nola jokatu behar den REATErekin, nola egin behar zaion aurre legez kanpoko eskaintzari Turismo Sailetik eta plataformekiko harremanari. Horietako batzuk aktiboki ari dira lankidetzan sailarekin iragarki horiek kentzeko. “Plataformen erantzuna desberdina izan da, eta zalantzarik gabe zigortuko ditugu legez kanpoko iragarkiak kentzen laguntzen ez dutenak”. Sailak 2.300 ikuskapen baino gehiago egin ditu eta 550 zehapen-espediente baino gehiago ireki ditu azken 3 urteetan.

“Euskadin gure etxeko lanak egin ditugu erabilera turistikoko etxebizitzak arautzeko eta kontrolatzeko arloan, eta lanean ari gara kontrol hori indartzen eta hobetzen jarraitzeko, beste sail, erakunde eta administrazio batzuekin lankidetzan arituta behar den guztian, eta eskerrak ematen dizkiot ministroari gai honetan eta beste batzuetan erakutsitako prestasunagatik eta lankidetzagatik”, amaitu du sailburuak.