• KODE ETIKOA
Basquetourrek Euskadiko Turismoaren Kode Etikoari buruzko prestakuntza eman die helmugetako profesionalei
Turismoaren Euskal Agentziak atzo Turismoaren Kode Etikoari buruzko formakuntza-jardunaldi bat antolatu zuen, Euskadiko 28 helmuga turistikoetako profesionalei zuzendua, 48 pertsonen partaidetzarekin. Era honetara, aurrez-aurreko prestakuntza berreskuratu zen, urte batzuk on-linekoa izan ondoren.
Jardunaldian metodologia berria azaldu zen, baita “Basquetour Learning”, Agentziaren webgunean kokatutako plataformaren hobekuntza gisa sartu diren zerbitzu berrien erabilera ere.
Euskadiko Turismoaren Kode Etikoaren xedea da, turismo-eragile guztiek erantzukizun sozialak eta ingurumenaren eta ekonomiaren jasangarritasuna eguneroko jardunean txertatzea.
Atzoko jardunaldiaz gain, proiektu honetan parte hartzen duten eragile guztiek, beraientzat beren-beregi diseinatutako prestakuntza-ibilbide bat egin beharko dute, ondoren nork bere helmugako erakundeei aholkularitza eskaini ahal izateko.
