• DTI
Goierri eskualdeak Turismo Helmuga Adimendunaren bereizgarria berritu du
Segittur eta Basquetourren arteko lankidetza-hitzarmenaren barruan, Goierri eskualdeak jarraipena eman dio Turismo Helmuga Adimendunaren ekintza-plana, 2022ko irailean egindako lehen diagnostikoaren ondoriozkoa, ezartzen jarraitzeko konpromisoari.
2025ean, Goierri eskualdeko Turismo Helmuga Adimenduna berrikusteko prozesuak Eusko Jaurlaritzako Turismo, Merkataritza eta Kontsumo Sailaren babesa izan du, Basquetour Turismoaren Euskal Agentziaren bitartez, baita helmugan eskumenak dituzten eskualde- eta udal-arlo guztien eta helmugako eragile pribatuen inplikazioa ere —Turismo Helmuga Adimendunaren berrikuspen horretarako beharrezkoa den informazioa ematen lagundu dute—.
Diagnostikoaren berrikuspenak jarraipena ematen dio betearazpen eta jarraipen faseari, eta aukera ematen du metodologiak markatutako estandarrak mantentzen direla eta, horrela, Turismo Helmuga Adimendunaren programaren bidez lortu nahi diren helburuak bermatzen direla egiaztatzeko.
Aitorpen horrek bi urteko balioa du, eta hura berritzeko prozesua bete beharko da. Hori dela eta, helmuga etengabeko hobekuntza-prozesu baten mende dago, eta helburuak eta estrategiak berritzeko eta etorkizuneko ingurunearen premietara egokitzeko konpromisoa hartzen da. Horrela, Turismo Helmuga Adimendunaren ereduaren oinarri diren gobernantzaren, jasangarritasunaren, teknologiaren, berrikuntzaren eta irisgarritasunaren bidez nabarmenduko da helmugaren balioa.
Goierri eskualdea Turismo Helmuga Adimendunen Sareko kide da 2022ko ekainaz geroztik, eskualdeak lurraldea eraldatzeko egin duen apustuaren erakusle. Azkenean, apustu hori Turismo Helmuga Adimendunen Metodologia ezartzearen bidez gauzatu du.
Turismo Helmuga Adimendunaren programa
Turismoko Estatu Idazkaritzak (SETUR) sustatzen du Turismo Helmuga Adimenduna programa, eta Berrikuntza eta Teknologia Turistikoak Kudeatzeko Estatuko Merkataritza Sozietateak (SEGITTUR) kudeatzen du. Programaren helburua da turismo-helmugen lehiakortasuna eta egoiliarren bizi-kalitatea hobetzen laguntzea, eta, horretarako, bost jarduera-arlotan eragingo du: gobernantza, berrikuntza, teknologia, jasangarritasuna eta irisgarritasuna.
2012-2015 aldirako Turismo Plan Nazional eta Integraletik sortutako ekimen horrek mekanismo egokiak sortzen ditu helmugetan berrikuntzak azkar sar daitezen.
Turismo Helmuga Adimenduna, beraz, turismo-helmuga berritzailea da, abangoardiako azpiegitura teknologiko baten gainean finkatzen dena eta lurralde turistikoaren garapen jasangarria bermatzen duena, guztiontzako irisgarria. Horrenbestez, bisitariaren eta ingurunearen arteko interakzioa eta integrazioa erraztuko du, eta, bisitariak helmugan duen esperientziaren kalitatea ez ezik, egoiliarraren bizi-kalitatearen hobekuntza ere areagotuko du.
Helburu horiek lortzera begira, Turismo Helmuga Adimendunaren programak turismo-jardueraren zeharkakotasuna eta helmuga bakoitzaren ezaugarri bereizgarriak kontuan hartzen dituen kudeaketa-eredua sustatzen du. Programa 97 betekizunetan eta 261 adierazletan oinarritzen den diagnostiko-metodologia baten inguruan artikulatzen da. Gomendio-sistema, ekintza-plana eta monitorizazio-sistema ditu ardatz, eta horiek dira ereduaren funtsezko elementuak, turismoaren egungo eta etorkizuneko erronkei egokitutako helmugaren kudeaketa etengabe hobetzeko prozesua ahalbidetuz.
