BASQUETOUR

Joan den ostegunean, Basquetourrek bi sentsibilizazio-jardunaldi antolatu zituen Euskadiko Turismoaren Kode Etikoaren inguruan, sektoreko hainbat eragileri zuzenduta, turismo-eredu arduratsuago, jasangarriago eta inklusiboago baten aldeko konpromisoa bultzatzeko. 

Lehen jardunaldian, Euskadiko bidaia-agentzia igorleek parte hartu zuten, baita Araba, Bizkaia eta Gipuzkoako elkarteetako ordezkariek ere: ABAE, BIBAE eta BIDAIKIDE. Gaur egun, 24 bidaia-agentzia daude proiektuan sartuta, eta jardunaldiaren ostean, 11 agentzia berri batu dira Kode Etikoari, beren jardunean iraunkortasun- eta erantzukizun-printzipioak txertatzeko konpromisoa hartuz. 

Bigarren jardunaldian, Barakaldoko Udaleko ordezkariek hartu zuten parte, udalerriko sektore pribatuko hainbat eragilerekin batera. Horrela, Barakaldok lehen urratsa egin du proiektuan, turismo-estrategia Euskadik sustatzen dituen balio etikoekin lerrokatzeko asmoz. 

Bi jardunaldietan, Kode Etikoaren proiektua zehaztasunez aurkeztu zen: zer ekartzen duen parte hartzeak, zer onura dakartzan bai erakundeentzat eta bai helmugarentzat, eta parte-hartzaileek zituzten zalantzak argitu ziren. 

Euskadiko Turismoaren Kode Etikoak oinarrizko printzipio batzuk ezartzen ditu, lurraldeko turismo-eragile guztiek euren eguneroko jardunean jasangarritasuna, erantzukizuna, errespetua eta elkar ulertzea barnera ditzaten. 

Proiektuaren seigarren edizio honetan, espero da 100 erakunde inguruk bat egingo dutela turismo arduratsuarekin, Basquetourren, turismo-lankidetzako erakundeen eta Eusko Jaurlaritzako Turismo, Merkataritza eta Kontsumo Sailaren eskutik. Aurreko edizioetan, 765 erakundek baino gehiagok hartu dute parte, eta Euskadi gero eta sendoago ari da finkatzen turismo-garapen iraunkorrarekin konprometitutako helmuga gisa.