BASQUETOUR

Gaur argitaratu da Eusko Jaurlaritzako Prospekzio Soziologikoen Kabineteak Basquetour Turismoaren Euskal Agentziaren laguntzarekin egindako hirugarren ikerketa, euskal gizarteak turismoari buruz duen pertzepzioa ikertzen duena. Txostenak erakusten duenez, EAEko herritarren % 97k uste du jarduera turistikoa garrantzitsua dela ekonomiarentzat, aurreko azterlanen ildo beretik.

Gainera, % 75ek uste du turismo-jarduera elementu positiboa dela gure eguneroko bizitzan. Lehenengo aldiz, jasangarritasun turistikoari buruz galdetu da. Bertan, % 81ek uste du Euskadiko turismoa arduratsua eta jasangarria dela, neurri batean edo guztiz, eta % 9k uste du ez dela.

Turismo, Merkataritza eta Kontsumoko sailburuak nabarmendu duenez, “euskal gizarteak turismoa positiboki hartzen duela erakusten du horrek, eta Euskadiko ekonomiarako giltzarritzat jotzen duela”. Gainera, sailburuak azaldu du datuak SIT sisteman sartuko direla, Euskadiko Inteligentzia Turistikoaren Sisteman. “SITa hainbat iturriren azterketa sakonean oinarritzen da, erabilgarritasun-ezagutza bihurtzen duen informazioa prozesatzeko eta aztertzeko. Sistema hori beste administrazio batzuen zerbitzura jartzen dugu, baina baita sektore pribatuaren zerbitzura ere. Beharrezkoa da informazio egokia izatea, gure lurraldearen garapen orekatua eta lehiakortasuna areagotzen laguntzen duten erabaki oinarrituak hartu ahal izateko. Ez dugu daturik galdu behar, aukerak galduko baititugu”.

Bidaiatzeko itxaropenak

Udara begira bidaiatzeko itxaropenek ez dute ia alderik 2022ko uda aztertzen zuen aurreko azterlanean adierazitakoekin. Gazteen % 66k uste du ziurrenik aisia-bidaiaren bat egingo dutela uda honetan, batez ere gazteenen artean (% 78k 18 eta 29 urte bitartekoen artean eta % 76k 30 eta 45 urte bitartekoen artean).

Egingo diren bidaia gehienak astebetekoak (% 46) edo bi astekoak (% 33) izango dira. Espainia izango da gehienek aukeratuko duten helmuga (% 10 Asturias, Kantabria edo Galizia, eta % 49 Espainiako gainerako lekuak). % 18 Europako beste herrialde batera joango dira, eta % 7k Europatik kanpo bidaiatzeko asmoa dute.

Inkestari erantzun dioten pertsonen ia erdiak (% 43) pentsatzen ari dira Euskadin irteeraren bat edo ihesaldiren bat egitea urte amaieran. Inkestari erantzun diotenen erdiak baino gehiago hasi dira bidaia prestatzen (% 60). Eta horri buruz informatzeko eta erreserbak egiteko batez ere Internet erabiliko dute: bai bidaiatzen den tokiaren arabera informatzeko (% 69), bai ostatua (% 70), garraiobiderik egokiena aukeratzeko (% 71), bai bertan egingo diren jarduerak (% 63), bai gastronomia (% 53) ezagutzeko.

2023ko Aste Santua

2022ko datuen antzekoekin, % 44k adierazi du bidaiaren bat edo ihesaldiren bat egin duela data horietan gaua kanpoan igaroz.

Aste Santu honetan oporretara joan diren hamar pertsonatik zortzik Espainiako hainbat erkidegotan bidaiatzearen alde egin dute. Gaztela eta Leon aukeratu dute gehienek (% 16), eta ondoren Kantabria (% 10). Biztanleriaren % 8k bidaiatu du Euskadin barrena. Elkarrizketatutako pertsonen % 11k Europa aukeratu dute, eta % 2k, berriz, mundu osoko beste leku batzuetara bidaiatu dute. Atzerrira joan direnen kopurua apur bat igo da 2022arekin alderatuta.

Egindako jarduerak batez ere aire zabalekoak izan dira: paseatzea eta paisaiaz gozatzea (% 55) eta naturan (% 32) eta gastronomian (% 31) jarduerak egitea.

Oro har, % 97 oso edo nahiko pozik dago egonaldiarekin. Gainera, Euskadira bidaiatu duten pertsonak besteak baino gusturago daude ostatuaren kalitatearekin, jasotako tratuarekin eta inguruko eskaintza gastronomikoarekin.

Euskadiko bidaiaria

Oporretan kanpora irteteko edo ihesaldi laburrak egiteko ohitura oso zabalduta dago Euskadiko biztanleen artean. Izan ere, herritarren % 77k dio oporretarako astebeteko edo gehiagoko bidaiak egiteko ohitura duela urtean behin gutxienez, eta horietatik % 39k urtean behin baino gehiagotan. Gainera, % 60k gau bateko edo biko ihesaldiak egiten dituzte urtean behin gutxienez; horietatik, erdiek baino gehiagok urtean behin baino gehiagotan (% 52). Pandemiaren aurretik, % 83 ziren urtean bidaiaren bat egiten zutenak, eta % 64 gau bateko edo gehiagoko ihesaldiak.

Ohikoa da, bestetik, gaua igaro gabe egun bateko txangoak egitea (% 73k gutxienez urtean behin): % 24k hilero egiten dituzte, % 43k urtean behin baino gehiagotan eta % 6k urtean behin. Ehuneko horiek iazkoak baino zertxobait handiagoak dira, baina oraindik ez dira iristen pandemiaren aurrekoetara. Pandemiaren aurretik, % 81ek adierazi zuen gutxienez urtean behin ateratzen zela.

Gainera, % 39k dio bigarren etxebizitza bat erabiltzeko prest dagoela oporretarako (jabetzan edo familian).

Biztanleriak, oro har, bikotekidearekin (% 38) edo bikotekidearekin eta seme-alabekin (% 25) bidaiatzen du, gazteenen (18-29 urte) kasuan izan ezik, horiek modu desberdinagoan bidaiatzen baitute: lagunekin (% 31), bikotekidearekin (% 26) eta gurasoekin eta beste senide batzuekin (% 20).

Gehienek nahiago dute beren bidaiak euren kasa planifikatu (% 67), eta % 16k soilik jotzen dute bidaia-agentzia batera. 65 urtetik gorako pertsonak dira establezimendu mota horietara gehien jotzen dutenak egin nahi duten bidaiari buruzko informazioa jasotzera (% 33), baita turismo-pakete oso bat gehien erosten dutenak ere (% 11).

EAEko biztanleei bidaietarako eta ihesaldietarako informazioa emateko, Internet da gehien erabiltzen den iturria. Internet bidez informatzeko planteatutako 4 moduak batuz gero −helmugaren edo erreserbaren webguneak (% 35), sare sozialak (% 18), bidaia-blogak (% 9) eta, oro har, Interneteko bilaketak (% 3)−, Internet da biztanleriaren % 65ek erabilitako informazio-baliabidea. Alderdi horretan hazkunderik handiena Sare Sozialetan izan da, 5 puntuko igoerarekin. Bigarrenik, bidaiak eta ihesaldiak planifikatzeko gehien erabiltzen den informazio-iturria lagunen eta senideen gomendioak dira (% 53).

Azkenik, Euskadi barruko bidaietan, herritarrak gehien motibatzen dituena euskal kostaldea (% 71 asko edo nahikoa) eta paseatzeko edo jarduerak egiteko natura-guneak ( % 63) dira.