BASQUETOUR

Daniel Solana Basquetour-eko zuzendariak atzo aurkeztu zuen “Euskadi Confidential”, Italiako modaren hiriburuan, Milanen, 80 turoperadore eta kazetari italiarren aurrean, OETek antolatutako workshop batean.

“Euskadi Confidential”– ek Euskadiko eskaintza turistiko esklusibo eta bereziena biltzen du, eta gero eta zorrotzagoa den publiko bati zuzenduta dago, zerbitzu erabat pertsonalizatuak bilatzen dituena eta helmugaz gozatu nahi duena, berezi sentiarazten duten jarduerak eginez. Lurralde osoko 80 enpresa baino gehiagoren hautaketa zaindua barne hartzen du, ostatuek, jatetxeek, saltokiek, garraioek, esperientzia turistikoek, kultura- eta museo-baliabideek, besteak beste, osatua.

Italiako merkatua Euskadiko turismo-eskaintza sustatzeko eta merkaturatzeko lanean ari direnetako bat da; izan ere, gure helmugarekiko interesa duen merkatua da, eta bisitarien eta ostatu-gauen kopuruari dagokionez susperraldi argia erakusten du.

Horrela, 2022ko lehen 8 hilabeteetan, urtarriletik abuztura, % 22tik gorako igoerak izan dira 2021eko aldi beraren aldean, eta Italiako merkatua 12. postuan kokatu da merkatu igorleen ranking orokorrean, % 2ko kuotarekin.

Urtarokotasunari dagokionez, Euskadi bisitatu duten turisten portaerari buruzko “IBILTUR 2019” azterlanaren arabera, merkatu horrek kontzentrazio nabarmenak ditu udako hilabeteetan. Bisitatzen gaituztenen batez besteko adina 45 urtekoa da, helmuga hori (50 urte) bisitatzen duten nazioarteko bisitarien batez bestekoa baino handiagoa. % 89k hotel-establezimenduetan hartzen du ostatu, % 6k kanpinean, % 2k landa-ostatuetan eta % 2k apartamentu turistikoetan. Batez besteko egonaldia 4,9 gauekoa da, eta batez besteko gastua, pertsona eta eguneko, 125 €-koa da, gure helmuga bisitatzen duen turismoaren batez besteko gastua baino handiagoa.

Euskadi bisitatzeko motibazio nagusiak gastronomia eta ardoak ( % 20), kultura eta ekitaldiak ( % 19), hiriko turismoa ( % 17), kostaldeko turismoa ( % 16), touring-a ( % 16), natura eta abenturako turismoa ( % 6) eta landa-turismoa ( % 5) dira.

Euskadira egindako bidaian egindako jarduerei dagokienez, jarduera kulturalak egitean eta Euskadiko kultura eta tradizioak ezagutzeko interesean nabarmentzen dira. Era berean, gainerako merkatuak baino aktiboagoak dira arriskuko kirola egitean eta, batez ere, Aste Nagusia bezalako jai herrikoietara joatean.

Bisitarien % 57 hegazkinez etortzen dira, eta % 31 ibilgailu pribatuan. Egonaldian, oinez joaten dira (% 85), baina % 58k garraio publikoa ere, erabiltzen dute.

% 58k bikotekidearekin bidaiatzen du, % 20k familiarekin, eta % 12k lagunekin. Euskadi helmuga oso positibotzat jo dute (% 93) eta % 82k Euskadi turismo-helmuga gisa segurtasun osoz gomendatuko dute.

Errepikatzeko asmoari dagokionez, % 8k ziurtasun osoz adierazi du Euskadira itzuliko dela.