BASQUETOUR

Hiru egun eta erdiko bisitaldian, golf-turismoaren euskal sareko ordezkaritza batek bidaia teknikoa egin du Costa Bravara, helmuga horretako golf-espezializazioko turismo-eskaintza bertatik bertara ezagutzeko helburuarekin. Ekimen hau Basquetourrek 2025ean garatzen ari den golf-produktuaren urteko ekintza-planaren baitan kokatzen da.

Euskal ordezkaritza sei golf-zelaitako ordezkariek, bi agentzia hartzailek eta Basquetourrek osatu dute, eta elkarrekin ezaugarri eta tamaina desberdinetako zazpi golf-zelaia bisitatu dituzte: Camiral – PGA, Empordà Golf Club, Golf de Pals, Serres de Pals, Golf d’Aro – Masnou, Torremirona Golf Club eta Golf Club Peralada. Horrez gain, golf-zelaiekin lotutako hainbat hotel-instalazio ere aztertzeko aukera izan dute.

Jardunaldietan zehar, lan-bilerak egin dituzte golf-zelaietako arduradunekin —zuzendaritza nagusiak, merkataritza-arduradunak eta operazioetakoak—, baita Girona – Costa Bravako Turismo Patronatuaren Golf Produktuaren Klubeko ordezkariekin eta Costa Bravako Golf Zelaien Elkarteko kideekin ere. Helburua izan da haien antolaketa-egiturak, merkaturatze-estrategiak eta kudeaketa-ereduak bertatik bertara ezagutzea.

Prospekzio-bidaia honen bidez, golf-turismoaren euskal sareak ezagutza tekniko, promozional eta komertzial baliotsuak eskuratu ditu;  horiek, baliagarriak izango zaizkio sarearen lan-dinamika sendotzeko ez ezik, Euskadiko turismo-eskaintza espezializatua aberasteko ere.

Golf-turismoaren euskal sarea

Golf-turismoaren euskal sarea 16 eragilek osatzen dute: 12 golf-zelai, 3 agentzia hartzaile (DMC), Euskal Golf Federazioa eta Basquetour bera. Urteko ekintza-plan baten bidez, sare honek honako helburu hauek lortzeko lan egiten du:

• Euskadiko golf-turismoaren azpiegitura garatzea.
• Helmuga intereseko nitxo turistikoan kokatzea.
• Lurraldeko turismo-eskaintza dibertsifikatzea.