BASQUETOUR

Turismo, Merkataritza eta Kontsumoko sailburu Javier Hurtadok Ibiltur 2022 txostena aurkeztu du gaur. Bertan, 2022ko udan (uztaila, abuztua, iraila) Euskal Autonomia Erkidegoa bisitatu zuten turisten profila eta portaera aztertzen dira. Bi urtez behingo azterketa hori 2021ean eten zen egoera pandemikoaren ondorioz, eta Euskal Autonomia Erkidegoa susperraldiaren buru izan den eta 2019arekin alderatuta turisten kopurua % 11 hazi den urtearekin ekin zaio berriro.

Azterketaren ondorio nagusi gisa, sailburuak, lehenik eta behin, Euskal Autonomia Erkidegoko turismo-eskaintza osatzen duten turismo moten aniztasuna nabarmendu du, horixe baita gure bisitariek bilatzen dutena. Motibazio nagusiak antzeko tamainako hainbat taldetan banatzen dira: kostaldeko turismoa, landa-turismoa, turismo gastronomikoa, kultura-turismoa, natura-turismoa, hirira egindako irteerak, ibilbideetako turismoa, besteak beste; horrek helburu bakarreko turismoaren ideiatik aldentzen gaitu. “Turismo turistiko jasangarriaren ereduaren alde egiten dugun apustuaren barruan, ekintza nagusietako bat eskaintzaren dibertsifikazioa da, desestazionalizazioan zein lurraldean barrena jende-fluxuen mugimenduan eragin zuzena duen faktorea delako”.

Bigarren puntu azpimarragarria da azken hiru urteetan hiri-helmugak protagonismoa irabazi duela. “Gure hiriburuen trakzio-elementu garrantzitsua funtsezkoa da turistak erakartzeko, baina badakigu turista horien mugimendua hain ezagunak ez diren beste gune batzuetara sustatzen jarraitu behar dugula.  Puntu horretan garrantzitsuak izaten ari dira Next Generation Funtsak, Jasangarritasun Turistikoko Planen bidez udalerri eta eskualdeetan gauzatzen ari diren 60 milioi euro baino gehiagorekin.  Halaber, funtsezkoak dira LJE Lehentasunezko Jarduketa Eremuak bezalako programak, eta hala 6,5 milioi inbertitu dira Enkarterrietan, Meatzaldean eta Ezkerraldean; berrikiago, milioi bat euro bideratu dira Aiara eskualdera. Halaber, joan den astean iragarri genuen Euskal Autonomia Erkidegoak 7,2 milioi euro jasoko dituela hiri- eta landa-merkatu jasangarrietarako eta turismoguneetarako; eta horrek helmugak hobetzen eta haien sustapena bultzatzen lagunduko du”.

Hiriko bisitekin batera, gastronomia da turistek bertara etortzea aukeratzeko duten arrazoietako beste izar nagusia. Gastronomia, motibazio gehienetan, plan osagarria da, eta oso garrantzitsua motibazio horien barruan, baina, gainera, nahikoa garrantzia du motibazio propio bihurtzeko eta beti Euskal Autonomia Erkidegoa bisitatzeko motibazio nagusien artean egoteko. Hori hala dela berresten da 2022ko azterketan. “Gainera, gastronomiak beste helmuga batzuetatik bereizteko eragile garrantzitsu gisa jokatzen du.  Neurri handi batean, pintxoen berezko markari zor zaio, eskaera guztietan zeharkako elementu baitira”.

Laugarren puntu azpimarragarri gisa, sailburuak gogobetetze- eta fidelizazio-maila azpimarratu du, 2019ko txostenean bezala goian egoten jarraitzen baitu. Euskal Autonomia Erkidegoaren balorazio orokorrean, balioak positiboak edo oso positiboak dira % 95etik gorako kasuetan bi urte horietan, baita helmugaren kalitatearen balorazioa ere. Gainera, 2022ko udan, Euskal Autonomia Erkidegoa bisitatu zuten turisten ia % 62k lehen aldiz bisitatu zuten (2019an % 50 izan ziren). Aurretik Euskal Autonomia Erkidegoa jada bisitatu zuten turisten artean, bertara berriz egindako bisiten kopurua ia 7ra iritsi zen batez beste; “beraz, oso bisitari fidelizatuak ditugu”.

Txostenaren beste datu azpimarragarri batzuk

• Bidaia bakoitzeko gastu turistikoa 2019an 582 euro zen bitartean 2022an 603 eurora igo zen. 

• Bisitatzen gaituztenen batez besteko adina pixka bat jaitsi da 49,5etik 47 urtera, eta “gainerako aldagaiak aztertuta, jaitsiera hori familia-turismoaren hazkundeari egozten diogu”. 

• Nazioarteko turismoa 2 puntu hazi da, % 49 izatera heldu arte. Turismo nazionalaren % 51tik % 9 barne-turismoa da, hau da, Euskal Autonomia Erkidegoan bizi diren eta gaua Euskal Autonomia Erkidegoko ostatuetan igarotzen duten pertsonak. 

• Bidaiatzera bultzatzea deritzogunaren barruan, hau da, Euskal Autonomia Erkidegoa aukeratzera zerk bultzatzen dituen kontuan hartuta, ahoz ahokoa da nagusi oraindik ere. Senideen eta lagunen gomendioek eraginda hona etortzea aukeratu dutenak % 62 dira, eta, ondoren, Internet (% 26,5) azaltzen da. 

• Euskal Autonomia Erkidegoan batez besteko egonaldia 4,4 egunekoa da

Laburbilduz, sailburuak amaitzeko hau esan du: “azterketak erakusten du Euskal Autonomia Erkidegoan eskaintza multifazetikoa, askotarikoa eta osagarria dugula, eta hori da bisitariek bilatzen eta estimatzen dutena.  Gu bisitatzeko haien arrazoi nagusiak gastronomia eta hiri-ihesaldiak dira, eta horrek gero eta erakargarriagoak egiten ditu gure hiriburuak; halaber, hori aprobetxatzen dugu hain ezagunak ez diren beste lurralde batzuk suspertzeko. Gogobetetze-maila oso altua dugu, eta errepikapen-tasa handia, batez beste 7 bisita, hau da, oso bisitari fidelizatuak dira”.

https://www.euskadi.eus/sit-sistema-de-inteligencia-turistica/web01-a2behtur/es/ 

https://www.euskadi.eus/perfil-y-comportamiento-del-turista-ibiltur/web01-a2behtur/es/