Lau jardunalditan zehar, Euskadik bere turismo-eskaintza espezializatua aurkeztu die merkatu estrategikoetako bidaia-operadoreei eta agentziei; besteak beste, Estatu Batuetako, Erresuma Batuko, Frantziako, Alemaniako, Herbehereetako, Suediako, Poloniako, Danimarkako eta Txinako profesionalei.

The Land of Great Champions lelopean, Euskadik golf-zelaien kalitatea eta helmugaren beste balio bereizgarri batzuk uztartzen dituen proposamena aurkeztu du, hala nola gastronomia, natura, kultura eta kostaldeko turismoa.

IGTM azokan izandako parte-hartzeari esker, aldez aurretik hitzartutako 40 bilera profesional baino gehiago egin dira golf-bidaien merkaturatzean espezializatutako enpresekin. Topaketa horien helburua izan da Euskadik turismo-segmentu honetan duen presentzia indartzea eta helmugarentzat negozio-aukera berriak sortzea.

Sustapen-ekintza honetan, Euskadirekin batera cannesen izan da Golf in Green Destination euskal harrera-enpresa espezializatua. Enpresak, gainera, nazioarteko erosleekin bilerak egiteko agenda propioa garatu du, eta horren bidez euskal eskaintzaren ikusgarritasuna handitzen lagundu du sektorearen nazioarteko erakusleiho nagusietako batean.

Golf turismoa produktu estrategikoa da Euskadirentzat, urte osoan nazioarteko profila duten bisitariak erakartzeko duen gaitasunagatik, urtarokotasuna murrizten laguntzen duelako eta helmugaren turismo-eskaintza dibertsifikatzen duelako.

Golfaren sustapena Euskadiko Golf Turismoaren Sarearen bidez garatzen da. Sare hori golf-zelaiek, enpresa espezializatuek, Euskadiko Golf Federazioak eta Basquetourrek osatzen dute, eta elkarlanean jarduten dute helmuga nazioarteko merkatu honetan gero eta hobeto kokatzeko.