Euskadi Basque Country helmuga sustatzen dugu, merkaturatzen laguntzeko
Batez besteko egonaldia luzatzeko helburuarekin, Turismoaren Euskal Agentziak produktu turistiko osoagoen eta erakargarriagoen aldeko apustua egingo du, bisitariari esperientzia gogobetegarriagoa eskaintzeko. Horrez gain, hazkunde esanguratsuagoak sustatuko dira goi-denboralditik kanpo, lehia txikiagoa denean.
Euskadi natura eta kultura-aberastasun handiko turismo-helmuga da; haren erakargarritasuna, ordea, eremu jakin batzuetan kontzentratzen da. Turismoa deszentralizatzeko asmoz, Basquetourrek Grand Tourraren aldeko apustua egingo du, euskal lurralde osoa zeharkatzeko gonbita egiten duen turismo-produktua, hain zuzen ere. Horrez gain, Euskadiko hainbat eremu bisitatzera bultzatuko duten zeharkako proposamenak onduko dira.
Euskadik turismo-estazionaltasun handia du, eta bisitariak udan pilatzen dira batez ere. Turismoa desestazionalizatzeko asmoz, Basquetourrek proposamen bereiziak eskainiko ditu urteko urtaro bakoitzerako.
Gastua areagotzea helburu, helmugan gastu-ahalmen handia duten merkatuen eta segmentuen aldeko apustua egingo du Basquetourrek. hala nola luxuzko turismoa, golfa edo MICEa. Era berean, arreta berezia jarriko zaio tokiko euskal jardueren eta produktuen erosketak sustatzeari.
Dagoeneko finkatuta dagoen turismo-identitate batetik abiatuta, Euskadi - Basque Country marka indartzea da helburua, nazioarteko merkatuan bikaintasun-erreferente gisa kokatzeko. Hori lortzeko, gure balio bereizgarria etengabe sendotuko duen kudeaketa koherente eta iraunkorraren aldeko apustua egiten dugu
Euskadik turismo-sektore zatikatua du, eta modu independentean jarduten duten eragileak hartzen ditu barne. Sektorearen gobernantza hobetzea helburu, kudeaketa koordinatuagoa eta operatiboagoa sustatuko du Agentziak.
Sustapen digital aurreratu eta segmentatua jorratuko dugu, merkatu-nitxo estrategikoetan zehaztasunez eragin ahal izateko. Horrekin batera, funtsezko eragileekiko aliantzak sendotuko ditugu (agentziak, prentsa eta preskriptore digitalak), gure markaren ospea hedatzeko eta irismena zabaltzeko.
Ezagutu gure marketing estrategia
2023-2027 aldirako Euskadiko Turismo Marketin Planaren helburua Euskadi erreferentziako turismo-destino gisa kokatzea da, batez ere nazioartean. Helburu hori erdiesteko, Turismo Marketin Plana oinarrizko zutabe hauetan ardazten da:
Kalitatezko turismo-eskaintza erakargarria garatzen dugu. Produktu turistiko erakargarri, errentagarri eta jasangarriak bultzatu eta sustatzen ditugu, Euskadi nazioartean erreferentziazko turismo-helmuga gisa kokatzen laguntzeko.
Produktu klubak
Basquetourren produktu-klubak lankidetza-egiturak dira. Horien bidez, enpresak, helmugak eta turismo-eragileak elkartzen dira produktu estrategikoak sustatzeko; adibidez, gastronomia, premium turismoa, ekoturismoa, familia-turismoa, LGTBIQ+ edo golfa. Horien helburua Euskadiko turismo-eskaintza indartzea, lehiakortasuna hobetzea eta sektore publikoaren eta pribatuaren arteko kudeaketa koordinatua bermatzea da.
Klub horiek gobernantza-, sustapen- eta merkaturatze-ekintzak bultzatzen dituzte, eta sinergiak sortzen dituzte esperientzia integratzaile eta jasangarriak eratzeko, Euskadi helmuga bereizi eta erakargarri gisa kokatzeko asmoz, estatuko zein nazioarteko merkatuetan.
@visiteuskadi kontuan (Instagram eta TikTok), gure hiru lurraldeetako txoko bakoitza esperientzia partekatu bihurtzen dugu.
Euskadin gertatzen bada, gure sareetako jarioan dago.
Basquetourren, komunikazio digitaleko estrategia handinahi bat gidatzen dugu, sareetako presentzia aktiboa eta nazio nahiz nazioarte mailako hedabide-plan sendoa uztartzen dituena. Merkatu estrategikoetan gure nortasuna islatzen duen sustapen aurreratu eta segmentatuaren alde egiten dugu.
Hori lortzeko, elkarlan estuan aritzen gara turismo sektorearekin eta lurraldeko eragileekin, eta hotelak, jarduerak eta turismo-baliabideak gure kontakizun digitalean txertatzen ditugu. Ekitaldi garrantzitsuenen zuzeneko jarraipenari eta uneoro eguneratutako edukiari esker, komunitate bizia eta etengabe hazten ari dena mantentzen dugu, bidaiariak gure lurraren muinarekin lotzen dituena.
