Euskadik, Basquetour Turismoaren Euskal Agentziaren bidez Liébanan (Kantabria) egindako Ekoturismoaren VIII. Kongresu Nazionalean parte hartu du. Kongresua erreferentziazko topagunea da jasangarritasunean eta natura-ondarearen kontserbazioan oinarritutako turismo-eredua garatzeko lan egiten duten profesional, turismo-helmuga eta enpresentzat.

Basquetourrekin batera, Euskadiko hainbat turismo-helmugak eta erakundek ere parte hartu dute kongresuan. Besteak beste, Bizkaiko Foru Aldundiaren Turismo Zuzendaritzak, Euskal Kostaldeko Geoparkeak, Uribe Kostak, Gorbeiak, Lea-Artibaik eta Urdaibaik hartu dute parte sektoreko profesionalen arteko topagune honetan.

Foroak Estatu osoko turismo-helmugen eta enpresen 200 ordezkari bildu ditu, esperientziak trukatzeko, ekimenak aurkezteko eta ekoturismoaren etorkizuneko erronkak eta aukerak aztertzeko.

Kongresuaren emaitzetako bat Potes 2026 Adierazpena bultzatzea izan da. Dokumentuak lan-ildo berriak ezartzen ditu, Espainian ekoturismoaren garapena bideratzeko eta turismo-helmugen, administrazioen, enpresen eta profesionalen arteko lankidetza sendotzeko.

Egitaraua Liébana eskualdeko ekoturismo-proiektuak eta -esperientziak bertatik bertara ezagutzeko bisitekin osatu da. Bisita horiei esker, lurraldearekin lotutako enpresa-ekimenak eta turismo-proposamenak zuzenean ezagutzeko aukera izan dute parte-hartzaileek.

Euskadik topaketa honetan parte hartu izana ekoturismoa sustatzeko duen konpromisoaren barruan kokatzen da. Gaur egun, Euskadiko ehun enpresa inguru Soy Ecoturista klubeko kide dira. Sare horrek natura-baliabideak balioan jartzeko eta naturarekin lotutako turismo-esperientziak garatzeko konpromisoa duten profesionalak biltzen ditu.