Basquetour Turismoaren Euskal Agentziak eta Espainiako Trenbideen Fundazioak beste urtebetez berritu dute elkarlan-hitzarmena, Euskadiko Bide Berdeen sustapenean eta posizionamenduan elkarrekin lanean jarraitzeko.

Bi erakundeen arteko lankidetza etenik gabe mantendu da 2015etik, eta aukera eman du trenbide zaharren trazadurak berreskuratzen dituzten ibilbide horien sustapenerako estrategia bateratua finkatzeko. Gaur egun, bide horiek turismo-, kirol- eta aisialdi-erabileretarako egokituta daude.

Hitzarmenean aurreikusitako egitasmoen artean daude, esaterako, estatu eta Europa mailako proiektuetarako aukera eta hautagaitza bateratuak identifikatzea, eta Euskadiko Bide Berdeen inguruko edukiak fundazioaren webgunean etengabe eguneratzea. Era berean, sare sozialetako kanpainak, komunikazio-ekintzak, hedabide espezializatuetan zabalkundea, eta jardunaldi eta topaketetan parte-hartzea gauzatuko dira.

Lankidetzak, halaber, sustapen turistikoko jarduerak eta aurkezpen bateratuak jasotzen ditu, baita Euskadiko Bide Berdeek Espainiako Trenbideen Fundazioak parte hartzen duen azoka eta ekitaldietan presentzia izatea ere. Bestalde, erakundearen sare sozialetako profilek, 83.000 jarraitzaile baino gehiagoko komunitatea dutenez, zabalkunderako kanal estrategiko eta eraginkorra osatzen dute.

Euskadik hamar bide berde baino gehiago ditu gaur egun, eta guztira 150 kilometrotik gorako ibilbide-sarea osatzen dute. Mugakide diren erkidegoekin partekatutako tarteak ere kontuan hartuz gero, sare horren luzera 300 kilometro ingurura iristen da. Euskadik bide berdeen sare trinkoenetako bat dauka; horrek agerian uzten du industria-ondarearen berreskurapenaren, mugikortasun jasangarriaren eta zikloturismoaren alde egin duen apustu estrategikoa.

Hitzarmenaren berritzeak Euskadiko Bide Berdeen ikusgarritasuna indartzen jarraitzea ahalbidetuko du, bai eta natura-, ondare- eta mugikortasun aktiboarekin lotutako turismo-eskaintza sustatzen aurrera egitea ere.