Basquetour Turismoaren Euskal Agentziak NECSTouR sarearen (Europako Eskualdeen Sarea Turismo Jasangarri eta Lehiakorrerako) Urteko Bilkura Nagusian parte hartu berri du. Topaketa Frantziako Bourges hirian egin da, 2028ko Europako Kultur Hiriburu izendatu baitute. Hitzorduak Europako 35 eskualde baino gehiagotako ordezkariak, erakundeetako arduradunak eta sektoreko adituak bildu ditu, Europako turismoaren erronka nagusiei buruz eztabaidatzeko, ikuspegi jasangarri, berritzaile eta lurraldeko batetik.

“Turismoa eta Kultura: sorkuntzatik ondarera – lurralde erresilienteak eta konektatuak eraikitzen” lelopean, 2026ko Bilkura Nagusiak kultura-ondarearen eta turismo-kudeaketaren integrazioan jarri du arreta, helmugetan epe luzerako balioa sortzeko bide gisa. Testuinguru horretan, eskualde anfitrioiak, Centre-Val de Loirek, Bourges 2028ko Europako Kultur Hiriburu izateko prestaketari lotutako lurralde-garapeneko eredua partekatu du, eta nabarmendu du kulturak funtsezko zeregina duela helmugen eraldaketan.

Programan Mona Björklundek hartu du hitza, Europako Batzordeko Mugikortasun eta Garraio Zuzendaritza Nagusiko (DG MOVE) Politiken Koordinaziorako zuzendariak. Etorkizuneko Europako Turismo Jasangarriaren Estrategiaren eta 2028-2034 esparru finantzarioaren ildo nagusiak azaldu ditu, eta eskualdeek Europako turismo-politikak zehazteko orduan duten garrantzia azpimarratu du.

Agenda osatzeko, sektorerako lehentasunezkoak diren esparruei buruzko tailer espezializatuak egin dira. Horien artean daude, batetik, Data Hub izenekoa, turismo-datuak biltzeko eta aztertzeko tresna aurreratuen erabileran oinarritua; eta, bestetik, Climate Hub izenekoa, arrisku klimatikoen azterketari eta helmugetarako egokitzapen-neurri praktikoen identifikazioari eskainia.

Horrez gain, Batzarrak networking-erako eta eskualde arteko lankidetzarako guneak eskaini ditu, NECSTouR sareko kideen artean esperientziak eta jardunbide egokiak elkartrukatzea bultzatuz.

Basquetourrek Europako foro honetan parte hartzeak jasangarritasunarekin, berrikuntzarekin eta eskualde arteko lankidetzarekin duen konpromisoa indartzen du. Era berean, NECSTouR sarearen barruan eta Europako turismoaren etorkizunari buruzko eztabaida estrategikoetan eragile aktibo gisa duen posizioa finkatzen du.