Gaur goizean, otsailak 26,  Euskadi Bidaiari Berriarentzat: Benetakotasuna eta Konexioa izeneko webmintegia antolatu du Basquetour Turismoaren Euskal Agentziak. Hitzorduaren helburua izan da euskal turismo-sektoreari aurkeztea belaunaldi berrien —Z (1997-2010) eta Alpha (2011-2024)— artean Euskadik helmuga gisa duen pertzepzioari buruzko azterketa baten emaitzak. Gainera,  ezagutza hori ekintza bihurtzeko gakoak helarazi dizkiete jardunaldian parte hartu dutenei.

Sarean egin den topaketa honek gure lurraldeko turismo-sektoreko 60 profesional eta eragile baino gehiago bildu ditu, eta turismo-kontsumitzaile berriak planteatzen dituen erronkei eta aukerei buruzko hausnarketa kolektiborako gunea sortu du.

Etorkizuneko bidaiaria ulertzeko azterketa bat

Mintegiaren ardatz nagusia duela lau hilabete Basquetourrek eta Mazinnek elkarlanean egindako azterketa baten emaitzen aurkezpena izan da; hain zuzen ere, belaunaldi berriek Euskadi turismo-helmuga gisa nola hautematen duten aztertzea izan du helburu nagusia. Datuek agerian utzi dute, batetik, lurraldearen potentziala, eta, bestetik, eredu jasangarriago eta desestazionalizatuago baterantz aurrera egiteko estrategikoenak diren gazte-profilen artean potentzial hori aktibatzeko funtsezko gakoak.

Jorraturiko gaien artean, saioan sakondu da zergatik diren bereziki estrategikoak bidaiari kulturzaleak eta abenturazaleak bezalako profilak fluxu turistikoak arintzeko eta eskaera urte osoan eta lurraldean zehar banatzeko.

Webinarrean zehar, Euskadik kontsumitzaile turistiko berriarentzako helmuga gisa duen sendotasuna agerian geratu da, bai eta balio hori modu koherentean eta bereizgarrian komunikatzeko garrantzia ere. Basquetourrek sektoreko eragileekin batera lanean jarraituko du, ikaskuntza horiek kalitatezko turismo dibertsifikatu eta jasangarria bultzatuko duten estrategiak garatzeko.