Euskadi, hirugarren urtez jarraian, ILTM Asia Pacific azokan parte hartzen ari da. Asia-Pazifiko eskualdeko luxuzko turismoaren nazioarteko azoka nagusietako bat da hau, eta Singapurren egiten ari dira 2026ko ekainaren 29tik uztailaren 2ra bitartean. Euskadi Basque Country Confidential marka  segmentu horretan duen presentzia finkatzeko eta merkatu estrategikoetan aukera komertzial berriak sortzeko helburuarekin dihardu egunotan.

Edizio honetan, euskal ordezkaritza osatu dute Maria Cristina eta Carlton hotelek, bai eta ROMOTUR bidaia-agentzia hartzaileak ere. Bidaia honen xedea Euskadiren nazioarteko proiekzioa premium turismoaren esparruan indartzea da.

ILTM Asia Pacific azokak luxuzko turismoko nazioarteko 650 marka baino gehiago eta aholkulari nahiz erosle espezializatu biltzen ditu, bai eta Asia-Pazifikoko eta Ozeaniako 30 herrialde baino gehiagotatik etorritako parte-hartzaileak ere. Azokaren formatuak —aldez aurretik hitzartutako B2B bileretan, prestakuntza-saioetan, networking-topaketetan eta ekitaldi profesionaletan oinarrituak— helmugen, luxuzko bidaia-agentzien, travel designer-en, hedabide espezializatuen eta nazioarteko marken arteko zuzeneko harremana errazten du.

Euskadi azoka honetan egoteak ikusgarritasuna lantzen jarraitzeko aukera ematen du, besteak beste, Txina, Japonia, Hego Korea, Australia, Zeelanda Berria eta Asiako Hego-ekialdea gisako merkatuetan, non gero eta interes handiagoa dagoen kalitate handiko eta nortasun propioko bidaia pertsonalizatuekiko.

Euskadik ILTM Asia Pacific 2026 azokan aurkeztu duen proposamenak gastronomiari, kulturari, ongizateari, paisaiari eta jasangarritasunari lotutako esperientzietan jartzen du arreta; betiere, esperientzia esklusibo eta bereiziak bilatzen dituen eroste-ahalmen handiko bidaiariari zuzenduta.

Parte-hartze berri honekin, Euskadik premium segmentuko nazioarteko sustapen-estrategiari eusten dio, eskaintza bereizgarri batean eta esperientziaren kalitatean oinarritutako turismo-eredu baten bidez.