Greg Van Avermaet Belgikako olinpiar txapeldun eta txirrindulari profesional ohia Araban izan berri da, lurraldeak zikloturismorako eta gravel modalitaterako dituen erakargarriak nazioartean ezagutarazteko egitasmoari esker. Lourdes Oyarbide txirrindulari arabarra izan du anfitrioi eta bidelagun, eta zenbait txoko bisitatu dituzte elkarrekin, Arabako paisaien eta errepideen aniztasuna nahiz lurraldeak bizikletaz gozatzeko eskaintzen dituen aukerak bertatik bertara ezagutzeko.

Ibilbideak Arabako leku adierazgarrienetako batzuk bisitatu ditu, besteak beste, Añanako Gatz Harana, Arabako Lautada eta Arabako Errioxa. Bazter hauek agerian uzten dute lurraldearen eskaintza aniztasuna eta kirola, natura, ondarea, gastronomia eta kultura turismo-esperientzia berean uztartzeko duten gaitasuna.

Greg Van Avermaet nazioarteko txirrindularitzaren erreferenteetako bat izateak aukera eman du baliabide horiek bizikletazaleei ezagutarazteko. Horrela, ibilbideak eta paisaiak ez ezik, Arabaren nortasuna eta turismo aktiboko helmuga gisa dituen erakargarriak ere nabarmendu dira.

Gravela, hazten ari den txirrindularitza-eskaintzaren protagonista

Van Avermaeten egitarauak kirol-osagai nabarmena ere izan du. Larunbatean Orbea Rioja Alavesa ekitaldian parte hartu zuen. Gravelari lotutako hitzordua da, eta modalitate horretako txirrindulariak eta zaleak elkartzen ditu bizikletan ibiltzeko bereziki erakargarria den ingurune batean.

Horrez gain, txirrindulari ohiak esperientziak eta iritziak partekatu ditu The Wolf Race probako antolatzaileekin. Proba horrek ere Arabak gravel modalitaterako duen potentziala ezagutarazten laguntzen du. Antolatzaileekin izandako harreman zuzenari esker, gertutik ezagutu ahal izan ditu ekimen horien inguruan egiten den lana eta Araba txirrindularitza-helmuga gisa sustatzeko egiten duten ekarpena.

Gravelak pistak, bideak eta bigarren mailako errepideak uztartzeko aukera ematen du. Horregatik, Araba ingurune ezin egokiagoa da modalitate hori praktikatzeko: paisaia askotarikoak ditu, eta txirrindulari-profil desberdinetara egokitutako ibilbideak diseinatzeko aukera eskaintzen du. Natura, lasaitasuna, ondarea eta turismo-eskaintza osagarria uztartzeak are erakargarriago egiten du lurraldea, kirola egin bitartean ingurua ezagutu nahi dutenentzat.

Turismo aktiboaren eta nazioarteko sustapenaren aldeko apustua

Sustapen-ekintza hau Araba turismo aktiboko erreferentziazko helmuga gisa kokatzeko estrategiaren barruan dago, bereziki zikloturismoari eta gravelari dagokienez. Arabako Merkataritza Ganberaren, Gasteizko Udalaren, Arabako Foru Aldundiaren eta Basquetourren arteko lankidetzari esker, lurraldeko natura-, kultura- eta turismo-baliabideak bidaiatzeko eta aisialdiaz gozatzeko joera berriekin lotzen dituen sustapen-estrategia abiatu da.