VIA Gasteizko Aireportua Sustatzeko Elkarteak, Basquetour Turismoaren Euskal Agentziarekin lankidetzan, BGY Business Workshop 2026 ekimenean parte hartu berri du. Helburua Vitoria-Gasteiz, Araba eta Euskadiren ikusgarritasuna italiar merkatuan indartzea izan da, Milan-Bergamoko aireportuaren eta Gasteizko aireportuaren arteko aire-ibilbidearen bidez (Ryanair konpainiak kudeatua).

Ponte San Pietroko (Bergamo) Aruba Auditorioan asteartean, urtarrilak 27, egindako topaketak 40 erakusketari eta 61 agente bildu ditu. Hala, VIAk eta Basquetourrek lan-bilerak egin dituzte bidaia-agentziekin eta turismo-operadoreekin. Topaketa horiei esker, lankidetza-aukera berriak sortu eta helmugaren kokapena sendotu da B2B networking ingurune batean. Jardunaldia amaitzeko, laneko afaria egin dute.